"Ang hirap ng exam, hindi kasi ako nakapag-review ng mabuti kabagi, tuloy, kalahati lang ang nasagutan ko," panghihinayang ni Nini.

Kadalasan ay ganoon, hindi niya nasasagutang lahat ang mga tanong kapag may exam sila.

            "Buti ka pa Jean, nasagutan mo palang lahat ang questions. Mukhang nakapag-aral kang mabuti kagabi ah," sabi pa ni Nini.

            "Hindi naman, natiyempuhan lang na ang mga itinanong ay ang na-review ko," pagmamatuwid naman ni Jean.

            Pauwi na ng tagpong iyon ang dalawa sa inuupahan nilang kuwarto sa kalye ng Catalu–a malapit sa may hangganan ng Espa–a. Nabigla si Jean ng makitang nakatayo si Bong sa tapat ng pintuan ng bahay na tinutuluyan nila. Nakatawa.

            Sumiglang bigla si Jean. Sinunggo niya ng braso sa tagiliran si Nini. Nagkatinginan sila.

            "Kanina ka pa?" Usisa ni Jean sa nobyo ng nakangiti, hindi maitago ang galak.

            "Hindi naman, mga isang oras pa lang," sabay tawa ni Bong pagkasabi. 'Yun ang isa sa mga gusto ni Jean sa kanya, masaya raw siyang kausap. "Actually, kadadating ko lang din. Suwerte ko nga at nandito ka na rin, este kayo pala." sabi pa niya ng titigan si Nini na nakangiti rin naman.

            "Mukha nga, pinapawisan ka pa hanggang ngayon eh," ani Jean na lumitaw ang mapuputing ngipin sa pag ngiti.

            "Ikaw Nini, kamusta ka na?" bati ni Bong kay Nini ng may matamis na ngiti. Ngumiti lang din ito at nagkibit balikat. Lihim namang nakaramdam ng pagkayamot si Jean ngunit nagpatuloy pa rin sa pagngiti.

            "Doon tayo sa loob---," ani jean. Pumasok sila. Naupo sa sofa. Nagprepara ng meryenda si Nini at naiwan ang magkasintahan.

            May kinuha si Bong sa loob ng dala niyang paper bag. "Flowers for you my dear," aniya.

            Inamoy iyon ni Jean pagkaraan ay nagpasalamat, "Thank you, how sweet naman," malambing na sabi saka humalik sa labi ng nobyo.

            "Ehem, ehem." Si Nini. Dala na ang meryenda. "Sorry if I disturbed you, kain muna tayo."

            "Uy! my favorite, salad---," ani Bong. Kitang-kita sa anino niya ang biglang pagsaya. Parang bata. Malambing kasi si Bong. Kung minsan tuloy ay nagpaparang Ina si Jean na bine-baby ang nobyo.

            "Ako'ng gumawa niyan," pagmamagaling ni Nini.

            "Really? Nice. Alam mo isang gusto ko sa babae ay marunong magluto o magprepara ng masasarap na pagkain." Parinig ni Bong kay Jean. Alam niya kasing wala itong alam sa ganoon maging sa pagluluto man.

            Minsan nga ay naglaga ng itlog ang dalaga ay nasunog pa. Natuyuan pala ng tubig at hindi nito napansin. Naamoy na lamang nilang amoy sunog na kaya naalala.

            Manipis si Jean. Sa sinabing iyon ni Bong ay kumunot agad ang noo. Napansin iyon ni Nini at ni Bong man. Alam ni Bong ang gamot doon, lalambingin lamang niya ito ay ayos na.

            "Aba ay atin nang kainin ire at nasasayang ang lamig," ani Nini kaya nilantakan na nila. Ubos iyon.

            "Ang sarap talaga---, wala na bang kasunod?" usisa ni Bong. Halata tuloy ang katakawan. Nagtawanan naman ang magpinsan.

            Hindi nagtagal, pagkaligpit ng pinagkainan ay nagpaalam si Nini sa magkasintahan. "Oy! Doon muna ako sa 'taas at may gagawin pa ako."

            Bago tuluyang umakyat si Nini ay sumulyap muna kay Bong. Hanga kasi siya sa porma ng binata, nakasoot ng longsleeve, itim na sedang pantalon at black leather shoes. Bagay na hinahangaan niya sa isang binatang may soot ng ganoon.

            Tamang-tama naman na siya ring pagsulyap ng binata. Nagbanggaan ang sulyap ni Bong at Nini. Nagkatitigan sila. Unang umiwas si Nini. Ngunit bago iyon ay kinindatan siya ni Bong ng Isa, bagay na ikinangiti niya ng lihim.

            Kahit ganoon, nakadama ng kakaiba si Nini? Dati naman siyang kinikindatan ni Bong pero iba ang nadama niya ngayon. Parang may sugat na kumirot sa loob ng puso niya, pero kakaiba. Ramdam niya, hindi iyon makirot bagkus ay kasiya-siya sa kalooban niya, nasasarapan siya.

            Pero ayaw pumayag ni Nini na umiibig na yata siya kay Bong. Tamang hinahangaan niya ito at ideal man niya pero hindi niya magagawang ahasin ang kanyang pinsan. Mahal niya si Jean, na itinuturing na niyang best friend!